ENTROIDO MITOLÓXICO

ENTROIDO MITOLÓXICO

Acaso había algunha dúbida da temática do noso entroido? Como non podía ser doutro xeito, con todo o cariño que lle temos xa aos nosos seres mitolóxicos galegos, qué mellor que caracterizarnos coma eles nestas datas.

O noso meco xa nos enviou os mandatos para arrincar esta semana. E coma sempre, os disfraces quedáronnos ideais! Xulgade vós mesmos. 

Fixemos un pequeno desfile para compartir cos veciños esta festiña e amosar uns bailes que levábamos preparados. Por suposto, tamén presentamos os nosos seres mitolóxicos cun pequeno textiño que preparamos nas aulas. 

Ao rematar, volta ao cole para merendar, sacar unhas fotos no "photocall mitolóxico" que crearon os maiores de sexto co seu profe e a seguir coa troula. 

Día mundial da radio

O 13 de febreiro celebramos o día mundial da radio e para conmemorar esta data, no cole estivemos a traballar os anuncios publicitarios neste medio.

O alumnado de sexto curso aproveitou a ocasión para lanzar o seu anuncio radiofónico de presentación do supermercado que levan organizando unha boa parte do curso. Nel convídannos á súa inauguración. Velaquí o tedes:

Día da paz

 O 30 de xaneiro conmemoramos o día escolar da non violencia e a paz.

Dende o Concello de Poio propuxéronnos esta bonita actividade: "palabras máxicas que cambian o mundo". Aproveitamos a lectura na biblio dalgúns dos nosos contiños relacionados con esta temática para reflexionar despois e escoller unha palabra que para cada un de nós se relacione coa paz. 

Despois, escribímola nun anaquiño de papel e introducímola na chistera cun golpe máxico da nosa variña e enchendo de bos desexos este día.

Trasnos no cole?

 Esta semana Luno enviounos aos nosos buzóns unha carta dicindo que estaba algo preocupado polas cousas que estaban a suceder no cole.

O certo é que polas mañás estábamos a atopar cousas un tanto estrañas: cadeiras movidas de lugar, espuma de afeitar nas mesas, papel hixiénico tapando as portas... Podería ser un trasno?

Así que recopilamos entre todos algo de información nun documento e descubrimos como botar do noso cole a este ser mitolóxico tan falcatrueiro: puxemos unha presada de millo en cada aula e ao día seguinte, nin rastro do trasno e das súas trasnadas. 

Non llo contedes, pero o certo é que foi moi divertido telo rondando polo cole 😉

Iniciámonos na mitoloxía galega

 E como xa o estábamos a desexar... aquí temos os resultados da primeira tarefa do proxecto deste ano! 😁

O traballo de cada curso consistiu en investigar sobre o ser mitolóxico galego elixido e non vos imaxinades a de cousas interesantes que descubrimos. Mesmo os profes! Xa somos uns expertos e expertas en xanas, mouros, nubeiros, santa compaña e demais seres fantásticos.

25 DE NOVEMBRO

O 25 de novembro conmemoramos o día internacional da eliminación da violencia contra a muller.

Xa que a autora que estamos a traballar este trimestre é Eva Mejuto, escollemos o seu conto "Neko" para traballar todo o centro en conxunto e poder abordar en concreto a violencia exercida contra as mulleres. Foi un libriño que nos encantou ler e que nos fixo reflexionar moito.

O que non sabíamos era que nos esperaba unha sorpresa. Eva e Neko viñan de visita ao cole! Que ledicia poder compartir con eles as nosas sensacións tras traballar o libro, contarlles cánto nos conmoveu e poder facerlles preguntiñas. 

Os compis de 5º e 6º prepararon unha presentación que gravaron na radio escolar e como agasallo, fixémoslle un libriño de recordo con todos os nosos debuxos e reflexións tras ler a historia de Neko 💜

E un dos nosos exemplares da biblio, queda asinado como recordo deste día :)

Grazas, Eva e Neko!

SAMAÍN 2024

 Por fin celebramos unha das datas que máis nos gustan en Viñas: O SAMAÍN. 

Como cada ano desfrutamos dunha terrorífica sesión de contacontos na biblio a cargo dos nosos profes. Como non podía ser menos, as historias de terror xiraron en torno á nosa mitoloxía máis sinistra e así, por exemplo, coñecemos a lenda do Urco, un malvado can que vive no noso río Lérez.

E como xa vén sendo tradición, eliximos as gañadoras e gañadores do VI concurso de microrrelatos de medo, que puideron gravar a súa historia na radio escolar. Aquí as tedes para escoitalas de novo!